الرئيسية
اليوم ببالي نضحك شوي على كم موقف كانو يصيرو معنا ونحن أطافيل صغار وكيف كانو اهالينا يخوفونا وقديش في شغلات واختراعات لترعيبنا حتى مانعملنا شي اذية او لحتى نسمع الكلمة او ليخلونا نتربى صح بس جد انا بلاقي انو بعض هالقصص غلط على الرغم انه عزماننا كانت حلول ناجعة بس هلأ مابقا تنفع مع جيلنا الجديد ربي يحميهن تعو شوفو كيف كان يتم ترعيبنا مثلا
('
')_اول حدا في قائمة الرعب وهوه مشهور كتير على مدى قرون من الزمن بتخويف الصغار واللي هوه البوبوع او البعبع يلي فرط قلبي لاعرف كيف شكلة ناس بيقولو الو قرون وسنان كبار بعض الاطفال بقولو شكله اسود وعيونو حمر بس شو اختلفنا عشكلو الاساسي مدري هالبعبع متحول كل يوم بشكل
('
')_ كمان في مرة اتعرفت على حدا جديد للتخويف ألا وهو ابو دبي يلي بياكل البنت وبيخلي الصبي (تقولو مستأصدنا هالابو دبي نحن البنات مابعرف ليش والله نحن حبابات )
_في كمان سبدلا يلي بشق الحيط وبتدلا كمان عنصر تخويف جدا مخيف للاطفال واذا بيشوفو شي طفل مشاغب بدو يضل ساكت شي يومين من الرعبة
_مالنا فيها كمان هاد غير التخويف بالاح (بالنار ) وبالواوا وبالفليفلة الحدة يلي بتحرق اللسان
('
')_غير هيك في التخويف ببعض الحيوانات الاليفة والحبابة واللي عملت عقد لكتير من الاطفال متل مثلا تعا ياعوو عض فلان.. او تعي ياقطة عضية لفلان.. المصيبة انو صار بعض الاطفال لما كبرو حملو معن هالخوف وصارو اذا بشوفو بسبوسة صغنونة بموتو رعبة مالن خبر انو القطة اذا شافتن بترتعب قبلن
('
')_بس بتعرفو اللي محيرني عمو ابو الغاز (بياع انابيب الغاز)ليش بخوف ماكنت افهم
_لسه كلو بكفة والدودو بكفة تانية يعني هاد بحد ذاته مصيبة اذا اجه علينا يشكل رعب مو طبيعي للاطفال لما بيوسخو تيابن او ايديهن لانو بيجي الدودو وبيمشي عليهن اوبيعضن او بيصير يقرص فيهن
_لسه في كمان خالة الشحادة يلي اذا كنتو لحالكن بالبيت وفتحتولا الباب رح تخطفكم ويمكن تاخدكم تساويكن شحادين صغار متلها وتصير تحركشو بالزبالة
evil:
_كمان لاتنسو عمو الحرامي هاد اذا اجه برعب عنجد لانو في احتمال يموتنا او يضربنا او يأذينا يعني بمعنى تاني هاد اكتر شخصية مرعبة
('
')_لك حتى عمو الشرطي بخوف بتعرفو ليش لانو معو عصاية وكلبشات ويلي مابسمع كلمة امو وبيعذب ابوه بيجي عمو الشرطي بيحطلو الكلبشات بايديه وبحطو بالحبس
_ حتى عمو الدكتور له نصيب بتخويف الاطفال طبعا بكلمة بدي اخلي الدكتور يشكك ابرة او بدي خلي الدكتور يقلعلك سنانك كهكهكهكه من هييييييك مابحب روح عدكتور السنان هلأ اتذكرت
_كمان عنا مكان مشهور كتير الا وهوه جب الفار يلي بيحطو فيو الولاد المشاغبين والاشقياء واللي كسلانين بالمدرسة كمان بعد مايدهنولن ادانيهن مدري زيت مدري دبس كرمال يجو الفيران ياكلوهن ((عفكرة كان في بمدرستي بالابتدائي جب الفار وانا شخصيا شفته بعيني وكانت المعلمة دوما تهددنا فيو ((طبعا كان القبو يلي ملان مقاعد مكسرة ))
('
')بعتذر عالاطالة ويارب كون زرعتلكم ابتسامة حلوة عوجوهكم بس قبل ماانهي موضوعي شاركوني بقائمة المرعبين يلي كنتو تخافو منهن ونسترجع سوا ذكريات طفولتنا اللذيذة متلنا
:
